Policia e Kosovës ka arrestuar sot personin me inicialet M.S. (46), nën dyshimet për kontrabandë mallrash dhe sulm ndaj zyrtarëve policorë në Korbliq të Kaçanikut.
Task-Forca e Drejtorisë Rajonale Kufitare Lindje, e përbërë nga Policia e Kosovës dhe Dogana e Kosovës, ka tentuar më 2 shtator 2025 të ndalojë një automjet të tipit “Mercedes” kombi, i dyshuar për kontrabandë me mallra.
I dyshuari nuk iu është bindur urdhrit të policisë dhe gjatë ndjekjes, në të njëjtin fshat, me automjetin e tij ka goditur automjetin zyrtar të policisë, i cili më pas është rrokullisur, ku si pasojë tre policë kanë pësuar lëndime të lehta trupore. Pas trajtimit në spitalin rajonal të Gjilanit, ata janë liruar.
Automjeti i dyshuar është gjetur i braktisur pranë kufirit me Maqedoninë e Veriut, i ngarkuar me mall kontrabandë, i cili është konfiskuar dhe i është dorëzuar Doganës së Kosovës për procedura të mëtejshme ligjore.
Mallrat e sekuestruara përfshijnë 13.500 kuti me cigare “Grand”, 1600 kilogramë fara kungulli të pjekura, 460 kilogramë fara luledielli të pjekura, 100 kilogramë fara braziliane, 40 kilogramë ananas të tharë, 20 kilogramë banane të thara dhe 113.4 kilogramë boronica e kuqe e tharë, në vlerë prej 23.794 deri në 29.877 euro.
Pas intervistimit nga hetuesit e Sektorit Rajonal të Hetimeve në Ferizaj dhe me vendim të Prokurorit të Shtetit, i dyshuari është dërguar në mbajtje për 48 orë për procedura të mëtejshme hetimore.
Prokuroria kompetente ka cilësuar rastin si sulm ndaj personave zyrtarë, ndërsa për kontrabandën me mallra hetimet do të zhvillohen nga Dogana e Kosovës në bashkëpunim me Njësinë e Hetimeve Kufitare.
