Tre persona të dyshuar për vjedhjen e disa stolive të arit janë arrestuar të mërkurën në fshatin Poslishtë të Komunës së Prizrenit.
Sipas Policisë, stolitë e dyshuara të vjedhura janë gjetur në automjetin e përdorur nga të dyshuarit, si dhe në trupin e njërës prej tyre.
Pas evidentimit dhe dokumentimit nga njësia e krim-teknikës, me urdhër të Prokurorit, sendet i janë kthyer pronarit.
“Drejtoria Rajonale e Policisë në Prizren njofton se më datë 08.04.2026, rreth orës 00:06, është pranuar një informatë për një rast vjedhjeje në progres në fshatin Poslishtë, Prizren. Menjëherë pas marrjes së informacioneve, patrulla policore ka reaguar dhe në vendngjarje ka arritur të arrestojë tre persona të dyshuar: B.H., N.A., dhe D.P., të gjithë nga Prizreni. Në vendngjarje kanë dalë njësiti i hetimeve të stacionit policor Prizren si dhe krim teknika, ku janë sekuestruar disa stoli dhe bizhuteri që besohet të jenë stoli ari. Këto janë gjetur në automjetin e përdorur nga të dyshuarit si dhe në trupin e njërës prej tyre. Pas evidentimit dhe fotografimit nga ana e krim teknikës, me urdhër të Prokurorit, sendet e vjedhura i janë kthyer pronarit”, thuhet në njoftim.
Të dyshuarit janë ndaluar për 48 orë.
Po ashtu, Policia ka bërë të ditur se është konfiskuar edhe automjeti i përdorur në këtë rast.
Vlera e saktë e sendeve të vjedhura ende nuk është bërë e ditur.
“Personat e dyshuar do të intervistohen edhe për raste të tjera të ngjashme”, theksohet në fund të njoftimit.
