Policia e Kosovës ka arrestuar pesë persona të dyshuar për gjuajtje me armë zjarri në rrugën e Gjilanit, të dielën në Prishtinë.
Sipas njoftimit zyrtar, pas pranimit të informatës për të shtëna me armë, Njësitet e Policisë nga Stacioni Jugu dhe Sektori i Hetimeve të Kryeqytetit kanë dalë në vendngjarje dhe, pas veprimeve të shpejta operacionale, kanë arrestuar katër persona, duke sekuestruar gjithashtu armët e përdorura në incident.
Ndërkaq, pas hetimeve të mëtejshme, një person tjetër është identifikuar dhe arrestuar, nga i cili është sekuestruar një armë zjarri.
“Policia e Kosovës sot ka pranuar informatën për të shtëna me armë zjarri në Rrugën e Gjilanit, në Prishtinë, dhe menjëherë ka reaguar duke angazhuar njësitet përkatëse policore. Zyrtarë policorë nga Stacioni Jugu dhe nga Sektori i Hetimeve të Kryeqytetit kanë dalë në vendin e ngjarjes, ku si rezultat i veprimeve të shpejta operacionale kanë arrestuar katër persona të dyshuar dhe kanë sekuestruar armët e përdorura në këtë rast. Pas veprimeve të mëtejme hetimore, Policia ka arritur të identifikojë dhe arrestojë edhe personin e pestë të dyshuar, nga i cili është sekuestruar një armë zjarri”, thuhet në njoftim.
Personat e dyshuar janë intervistuar dhe, në koordinim me Prokurorinë e Shtetit, janë dërguar në mbajtje për 48 orë, për veprat penale: “Përdorimi i armës apo mjetit të rrezikshëm”, “Mbajtja në pronësi, kontroll ose posedim i paautorizuar i armëve” dhe “Posedimi i paautorizuar i narkotikëve”./teve1.info/
