Katër persona janë arrestuar si të dyshuar për përfshirje në një rast të “vjedhjes së rëndë”, pas një aksioni të realizuar nga njësitet policore në Mitrovicë.
Rasti ishte raportuar më 22 prill 2026 në Stacionin Policor në Vushtrri, ku ankuesi kishte deklaruar se persona të panjohur i kishin thyer xhamin e veturës dhe i kishin vjedhur rreth 400 copë cigare elektronike.
Si rezultat i veprimeve operative dhe hetimore, policia ka arritur të identifikojë dhe arrestojë katër të dyshuarit. Gjatë kontrollit të tyre është gjetur dhe sekuestruar një pjesë e cigareve elektronike të vjedhura.
Pas intervistimit dhe me vendim të prokurorit kompetent, njërit prej të dyshuarve i është caktuar masa e ndalimit policor, ndërsa tre të tjerët janë liruar në procedurë të rregullt.
Ndaj të dyshuarve janë iniciuar rastet për veprat penale “Vjedhje e rëndë” dhe “Blerja, pranimi ose fshehja e sendeve të përfituara me kryerjen e veprës penale”. /teve1.info/
