Policia e Kosovës ka njoftuar se ka arrestuar dy persona të dyshuar për një rast grabitjeje ndaj tre shtetasve të huaj, i cili kishte ndodhur një ditë më parë në Prishtinë.
Sipas policisë, të dyshuarit janë identifikuar si N.K., 26 vjeç, dhe A.K., 26 vjeç, të dy shtetas të Republikës së Kosovës. Arrestimi i tyre u bë pas veprimeve intensive hetimore të zhvilluara nga Sektori i Hetimeve të Kryeqytetit, në bashkëpunim me njësitë e Stacionit Policor Jugu.
Gjatë operacionit policor, te të dyshuarit janë gjetur dhe sekuestruar sendet, si dhe një shumë parash që dyshohet se janë marrë gjatë grabitjes.
Me urdhër të prokurorit të shtetit, pas intervistimit, të dyshuarit janë ndaluar për 48 orë, ndërsa hetimet për zbardhjen e plotë të rastit janë duke vazhduar./teve1.info/
