Dy shtetas të Kosovës janë arrestuar në Demir Kapi të Maqedonisë së Veriut, nën dyshimin për kontrabandim emigrantësh nga Egjipti.
Ndaj tyre është ngritur kallëzim penal dhe gjykata u ka caktuar masën e paraburgimit prej 30 ditësh.
Sipas Ministrisë së Punëve të Brendshme të Maqedonisë së Veriut, rasti ka ndodhur më 26 maj 2026, rreth orës 06:30, në pikën pagesore Demir Kapi në autostradën Gjevgjeli–Negotinë.
“Më 26 maj 2026, rreth orës 06:30, në pikën pagesore Demir Kapi në autostradën Gjevgjeli-Negotinë, zyrtarët policorë nga Stacioni Policor për Mbikëqyrje Kufitare “Mihajllovë” ndaluan A.G. (42) dhe G.G. (39), të dy nga Kosova. Gjatë kontrollit, policia ndaloi një automjet “Volkswagen Transporter” me targa të Kosovës, i drejtuar nga A.G., si dhe një automjet “Skoda Octavia”, po ashtu me targa të Kosovës, i drejtuar nga G.G”, thonë nga MPB e Maqedonisë.
Në automjetin “Volkswagen” janë gjetur shtatë emigrantë nga Egjipti, ndërsa automjeti tjetër dyshohet se shërbente si “pararojë” gjatë transportit.
Për rastin është njoftuar Prokuroria Themelore Publike për Ndjekjen e Krimit të Organizuar dhe Korrupsionit.
Të dy të dyshuarit janë dërguar në Burgun e Shkupit për vuajtjen e masës së paraburgimit, ndërsa emigrantët janë vendosur në Qendrën për Azilkërkues në Vizbeg./teve1.info/
