Kishte shkuar në një lokal ku po qëndronte kryeministri Albin Kurti në Mitrovicën Veriore.
Udhëheqësi i partisë, Demokracia Serbe, Aleksandër Arsenijeviç tentoi t’a pengojë gjatë vizitës së tij, kryeministrin Kurti.
Kështu për shkak se fishkëlleu, i njëjti u arrestua nga zyrtarët e Policisë së Kosovës në pjesën veriore.
Menjëherë pas këtij rasti, Inspektorati Policor i Kosovës doli me komunikatë ku tha se janë duke mbledhur provat nëse policët kanë tejkaluar autorizimet.
Tëvë1 ka kërkuar të dijë nga ky institucion rezultatet e hetimeve për arrestimet të njëjtit person në të kaluarën, mirëpo gjatë javës nuk ka pasur përgjigje.
E ish-kryeshefi i IPK-së, Valdet Hoxha thotë se për shkak të ndjeshmërisë së situatës në atë pjesë, policët duhet pasur kujdes në veprime të tyre.
“Jo pas çdo fishkëllime mund të ketë arrestime pra duhet të vlerësohet vërtetë përveç autorizimeve ligjore që i kanë ata, të vlerësohet edhe situata taktike në terren dhe varësisht edhe prej informacioneve po besoj në bazë të informacioneve të inteligjencës në periudha dhe rajone të caktuara ata edhe mund të veprojnë por duhet të jenë të kujdesshëm”, tha Hoxha.
Derisa ish-shefi i hetimeve në autoritetin mbikëqyrës të Policisë, Jetullah Aliu vlerëson që duhet një trajnim më i madh i zyrtarëve policorë në terren.
“Patjetër se po, për arsye se Policia e Kosovës duke u bazuar mbi Ligjin për Policinë e Kosovës të gjitha autorizimet i bazon në Ligj dhe ka nevojë që të trajnohet në vazhdimësi për përdorimin e forcës siç është edhe njëra nga detyrë e tyre edhe arrestimi. Mirëpo në këso rastesh çdo qytetar ka të drejtë që të bëjë ankesë në Inspektoratin Policor dhe të zhvillohen hetime qoftë preliminare, qoftë edhe penale derisa të përfundojë çdo procedurë gjyqësore”, tha Aliu.
Arsenijeviq është arrestuar edhe në të kaluarën për çka serbët lokalë patën protestuar para stacionit policor në veri. /teve1.info/
