Anësori brazilian i Real Betis, Antony, ka folur hapur për periudhën e tij te Manchester United, duke theksuar se nuk ka asnjë pendesë për aventurën në “Old Trafford” dhe se ajo periudhë ka qenë një kapitull i rëndësishëm në rritjen e tij personale dhe profesionale.
Antony kaloi periudhën e vështirë te Unitedi ndërsa në verën e kaluar nënshkroi përfundimisht me Betisin.
Megjithatë, braziliani nuk është fare pishman për kohën e kaluar te “Djajtë e Kuq”.
“Nuk mendoj se kam pse të pendohem, sepse çdo gjë ndodh për një arsye. Nëse shkova atje, ishte sepse Zoti deshi të më dërgonte për të mësuar dhe për të kaluar ato që kalova”.
“Sot ndihem një njeri shumë më i pjekur, si futbollist, por edhe si baba. Para se të firmosja me United, po, isha shumë afër të nënshkruaja me Liverpoolin. Por gjithçka ndodh për një arsye, dhe nuk dua të përqendrohem vetëm te periudhat e vështira, sepse kam fituar trofe dhe kam përjetuar momente të mëdha”.
Braziliani pranoi se faktorët jashtë fushës kanë ndikuar në performancën e tij, por mori përsipër përgjegjësinë për mungesën e vazhdimësisë.
“E di potencialin tim, e di cilësitë e mia. Nuk kam luajtur në Kupën e Botës kot dhe nuk jam kthyer në kombëtare pa arsye. E marr përgjegjësinë që gjërat nuk funksionuan siç doja, por gjithmonë përpiqem të shoh anën pozitive. Koha ime te United ishte e nevojshme që të kuptoja më mirë vetveten”, shtoi ai.
Pas largimit nga Liga Premier, Antony po rigjen vetëbesimin dhe formën në Spanjë, ku tashmë është një nga lojtarët kryesorë të Real Betisit.
