Katër anije janë përmbysur në një stuhi të papritur në një vend turistik në Kinën jugperëndimore, duke lënë të vdekur 10 persona, thanë mediat shtetërore të hënën.
Më shumë se 80 persona ranë në një lumë kur erërat e forta goditën zonën piktoreske në provincën Guizhou të dielën pasdite vonë, raporton AP.
Anijet u përmbysen pas një stuhie të papritur shiu dhe breshëri në rrjedhën e sipërme të lumit Wu, një degë e lumit Jance, lumit më të gjatë të Kinës.
Raportet fillestare thanë se dy anije turistike ishin përmbysur, por media shtetërore tha të hënën se katër anije ishin të përfshira. Dy anijet e tjera nuk kishin pasagjerë dhe shtatë anëtarët e ekuipazhit arritën të shpëtonin veten, tha transmetuesi shtetëror CCTV.
Presidenti kinez, Xi Jinping bëri thirrje për përpjekje të gjithanshme për të gjetur të zhdukurit dhe për t’u kujdesur për të plagosurit, tha të dielën agjencia zyrtare e lajmeve Xinhua.
Shtatëdhjetë persona u dërguan në spital, shumica me lëndime të lehta.
