Gjykata Speciale në Hagë ka publikuar një video përmbledhëse të procesit gjyqësor ndaj ish-krerëve të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit dhe Rexhep Selimit, duke përfshirë rrugëtimin e çështjes nga konfirmimi i aktakuzës deri në paraqitjen e dëshmitarëve.
Në njoftimin e saj, Specialja ka bërë të ditur se faza e deklarimeve përmbyllëse do të nisë më 9 shkurt, pas së cilës trupi gjykues do të fillojë vlerësimet konfidenciale të provave dhe dëshmive.
“Fjalët përfundimtare në gjyqin Thaçi et al. do të fillojnë më 9 shkurt”, thuhet në njoftimin e Dhomave të Specializuara.
Sipas kalendarit të publikuar, më 9 shkurt do të mbahet deklarata përmbyllëse e Prokurorisë, ndërsa më 10 shkurt ajo do të vazhdojë së bashku me deklaratën përmbyllëse të Mbrojtjes së Viktimave.
Më 11 shkurt do të paraqiten deklaratat përmbyllëse të mbrojtjes së Hashim Thaçit dhe Kadri Veselit, ku kjo e fundit do të vazhdojë edhe më 12 shkurt. Në të njëjtën ditë do të nisë edhe deklarata përmbyllëse e mbrojtjes së Rexhep Selimit, e cila do të vazhdojë më 13 shkurt.
Deklarata përmbyllëse e mbrojtjes së Jakup Krasniqit do të zhvillohet më 13 shkurt dhe do të vazhdojë edhe më 16 shkurt.
Pas përfundimit të kësaj faze, gjyqtarët do të vlerësojnë peshën dhe besueshmërinë e secilit dëshmitar si dhe çdo provë të paraqitur gjatë procesit gjyqësor.
Closing statements in the Thaçi et al. trial will begin on the 9th February. A brief overview of proceedings can be found here. pic.twitter.com/fP3iJSdNSf
— Kosovo Specialist Chambers (@SpecialChambers) February 3, 2026
