Ditë më parë kryeministri i Shqipërisë, Edi Rama ka njoftuar se në Asamblenë e Këshillit të Evropës janë mbledhur nënshkrimet për hartimin e një rezolute mbi atë të Dick Martyt të vitit 2011. Mirëpo opinionisti nga Shqipëria, Ben Andoni e sheh si të vështirë miratimin e kësaj rezolute.
Ai thotë se ka kaluar shumë kohë dhe do duhej të përfshinte edhe aktorë më të fuqishëm, siç janë Shtetet e Bashkuara të Amerikës.
“Megjithatë ka qenë një veprim i mirë i Shqipërisë, sado që unë mendoj që është i vonuar dhe më shumë duket për konsum të përgjithshëm, sepse ju e dini rezoluta ka vite dhe vite të tëra që është dhe askush nuk e pengonte autoritetin e shtetit shqiptar që ta bënte kohë më përpara këtë lëvizje të saj. Por ju i keni parë që liderët e Shqipërisë me liderët e Kosovës, pa çka që kohët e fundit po kalojnë mirë me njëri-tjetrin, nuk është se kanë shkuar mirë”, theksoi ai në “Ditari” në Tëvë 1.
Kryeministri Rama ka bërë të ditur se me këtë rezolutë do të kundërshtohet ajo e vitit 2011, në të cilën pretendohej për trafikim të organeve.
Raporti i Dick Martyt kishte çuar deri në formimin e Dhomave të Specializuara të Kosovës, për të hetuar krimet e pretenduara të pjesëtarëve të UÇK-së kundër pakicave etnike dhe rivalëve politikë. /Teve1.info/
