Të dielën përfundoi xhiroja e katërt e Superligës së Kosovës në basketboll, ndërsa të hënën Federata e Basketbollit të Kosovës zgjodhi pesëshen e javës, si dhe MVP-në.
MVP i kësaj xhiroje u shpall amerikani Kyan Anderson i Bashkimit, i cili ishte më meritori për fitoren e prizrenasve ndaj Sigal Prishtinës.
Anderson në këtë takim ishte i pandalshëm dhe një enigmë e pazgjidhur për skuadrën nga Prishtina, teksa realizoi 31 pikë, 2 kërcime dhe 8 asistime, duke arritur indeksin më të mirë – 35.
Në pesëshen e javës hyri edhe bashkëlojtari i Andersonit, Isiah Cousins, i cili përballë Prishtinës realizoi 23 pikë, 3 kërcime e 4 asistime.
Ndërkohë, në duelin mes Vëllaznimit dhe Borës, ku fituan gjakovarët, Ziggey Reid ishte më i dalluari, duke shënuar 28 pikë, 3 kërcime e 4 asistime, çka i siguroi vend në pesëshen e xhiros së katërt.
Qendra e Pejës, Alan Herndon, pati dyshifrorë të dyfishtë në duelin ndaj Rahovecit, duke e mbyllur ndeshjen me 13 pikë, 12 kërcime e 2 asistime, për indeksin 21, që i siguroi vend në pesëshe.
Lojtari i fundit që hyri në këtë listë është Mustapha Amzil, i Trepçës, i cili kontribuoi me 9 pikë e 10 kërcime në fitoren ndaj Golden Eagle Yllit.
Në këtë xhiro, asnjë lojtar vendor nuk u përfshi në pesëshen e javës të zgjedhur nga Federata e Basketbollit të Kosovës.
