Ambasadorja e Izraelit në Kosovë, Tamar Ziv, ka deklaruar se situata e sigurisë në Izrael është përmirësuar në mënyrë dramatike, si rezultat i Operacionit izraelit “Luani që po Ngrihet” dhe kërcënimi katër dekadash për ekzistencën e Izraelit nga regjimi iranian është shtyrë për shumë vite.
Diplomatja izraelite e cila është ambasadore në shtetin ballkanik, i cili ka hapur Ambasadën në Jerusalem, ka shprehur falënderimet ndaj Kosovës, për mbështetjen ndaj Izraelit.
“Pas bombardimit amerikan të tri objekteve bërthamore iraniane në Fordo, Natanz dhe Isfahan, Kryeministri Kurti ishte udhëheqësi i parë ballkanik që shprehu mbështetjen e tij dhe tha se armët bërthamore në duart e regjimeve autoritare përbëjnë një kërcënim të madh për sigurinë globale. Kosova qëndron fort përkrah SHBA-së dhe BE-së në kundërshtim me ambiciet bërthamore të Iranit. Ne e vlerësojmë qëndrimin e Kryeministrit Kurti, të gjitha vendet demokratike duhet të mbështesin veprimet e SHBA-së dhe operacionin e Izraelit në Iran dhe ta kuptojnë se duke dëmtuar ndjeshëm programin bërthamor të Iranit, e gjithë bota është një vend më i sigurt tani”, tha Ziv.
Ajo ka thënë se Populli i Kosovës dhe hebrenjtë që kanë jetuar në Kosovë historikisht gjithmonë kanë pasur marrëdhënie të mira fqinjësore.
“Gjatë Luftës së Dytë Botërore shumë shqiptarë të guximshëm shpëtuan jetën e hebrenjve që as nuk i njihnin. Kur Kosova përjetoi luftën dhe ishte në kohë nevoje, Izraeli ishte vendi i parë që vendosi një spital fushor në kufi me Maqedoninë e Veriut, i cili trajtoi refugjatët. Pas luftës, izraelitë të tjerë dhe veçanërisht z. Eli Eliezri dhe Dr. Moshe Landsman erdhën në Kosovë për të ndihmuar në rindërtimin pas luftës dhe Dr. Landsman punoi në Kosovë për 25 vjet derisa ndërroi jetë vitin e kaluar. Vendet tona po festojnë tani pothuajse 4.5 vite marrëdhënie diplomatike në të cilat është bërë përparim i madh në fusha të ndryshme, e fundit prej të cilave ishte Marrëveshja për Heqjen e Vizave që hyri në fuqi në fillim të majit”, tha ajo për RTKlive.
Ambasadorja e Izraelit në Kosovë, Tamar Ziv, beson e shpreson të kalojmë nga lufta në rindërtim dhe do të ‘jemi gjithashtu në gjendje të punojmë së bashku për të zhvilluar më tej marrëdhëniet mes vendeve tona’. Ajo shpreson se Izraeli të hap edhe ambasadë fizikisht në Kosovë.
“Shpresoj që viti i ardhshëm të sjellë një rritje të turizmit të ndërsjellë, delegacioneve, bashkëpunimit ekonomik, shkëmbimeve kulturore dhe arsimore dhe bashkëpunimit në shumë fusha të reja”, tha ajo.
