Sipas saj, kur bëhet fjalë për stabilitetin e Ballkanit Perëndimor, dialogu për normalizimin e marrëdhënieve ndërmjet Beogradit dhe Prishtinës ka një rol qendror.
Gjithashtu, Conrad theksoi se dialogu ka ndikim edhe kur bëhet fjalë për lirimin e resurseve sa i përket zhvillimit të dy vendeve si dhe për procesin e afrimit me Bashkimin Evropian.
“Këto synime nuk duhet të harrohen”, tha ambasadorja gjermane në Beograd dhe theksoi se shtysa për përparim në dialog duhet të vijë nga Beogradi dhe Prishtina, dhe theksoi se “e mbështesin plotësisht rolin koordinues të të dërguarit special të BE-së, Miroslav Lajçak”.
Conrad vuri në dukje se rritja e çmimeve të energjisë dhe disponueshmëria e reduktuar shpesh në mënyrë dramatike e disa burimeve të energjisë, janë një problem në të gjithë Evropën.
“Është e qartë se zgjidhjen mund ta gjejmë vetëm së bashku. Një pyetje e rëndësishme për ne është se si mund t’i mbështesim vendet e Ballkanit Perëndimor në çështje të rëndësishme të sigurisë energjetike dhe është e qartë se diversifikimi i burimeve të energjisë, nëpërmjet zgjerimit të burimeve të rinovueshme dhe, për shembull, duke përdorur potencialin e plotë si era dhe dielli, luajnë një rol qendror në gjetjen e një zgjidhjeje”, tha Conrad.
