Tri ditë pasi Shtetet e Bashkuara të Amerikës pezulluan dialogun e planifikuar strategjik me Kosovën, për një afat të pacaktuar, ambasada e Amerikës në Prishtinë siguroi popullin e shtetit më të ri në Evropë që SHBA-ja gjithmonë do të jetë mike e afërt e Kosovës.
Nga Ambasada Amerikane në Kosovë kanë thënë se janë të gatshëm të ecin përpara me qeverinë në detyrë, por iu duhet një partner që nuk bën veprime destabilizuese.
“SHBA-ja gjithmonë do të jetë mike e afërt e popullit të Kosovës, dhe ne jemi plotësisht të përkushtuar ndaj partneritetit tonë. Megjithatë, SHBA-ja i nxitë partnerët të punojnë në mënyrë konstruktive për ta siguruar stabilitetin dhe sigurinë. Ne duam të ecim para me qeverinë në detyrë, por na duhet një partner që kupton nevojën për t’i evituar veprimet destabilizuese dhe është i përkushtuar për të çuar përpara stabilitetin rajonal dhe t’i mbrojë të drejtat e gjithë qytetarëve të Kosovës. Ne do të vazhdojmë t’i vlerësojmë veprimet e qeverisë në detyrë. Nuk kemi asgjë për të shtuar në këtë pikë”, kanë thënë nga Ambasada Amerikane në Kosovë.
Ndërkohë, nga Ambasada Amerikane nuk kanë treguar nëse gjatë kësaj kohe janë pezulluar edhe trajnimet ushtarake për Forcën e Sigurisë së Kosovës.
Pa përgjigje për këtë temë kanë qenë edhe nga Ministria e Mbrojtjes.
Pezullimi i këtij dialogu në aspektin politik, sipas profesorit Nexhmedin Spahiu, është një shuplakë për Kosovën.
Sipas Spahiut, Amerika ka një qëllim me këtë pezullim.
Ndërkohë, në fillim të muajit gusht, sekretari amerikan i shtetit, Marco Rubio, kishte deklaruar se ishte pajtuar me ministrin e Jashtëm të Serbisë, Marko Gjuriq, që Shtetet e Bashkuara dhe Serbia të zhvillojnë dialog të përbashkët strategjik në fund të këtij viti.
Dialogu strategjik është një proces që Departamenti Amerikan i Shtetit, në shumicën e rasteve, e zhvillon me vende të ndryshme të botës me synim avancimin e marrëdhënieve bilaterale.
Ky proces përfshin diskutime të nivelit të lartë mes dy vendeve që zhvillohen ose në Uashington, ose në vendin përkatës, mbi një gamë të gjerë temash si mbrojtja, siguria, mjedisi, energjia, bashkëpunimi ekonomik, etj.
