Ministri i Infrastrukturës, Liburn Aliu ka dënuar ashpër dhunën e bandave të organizuara kriminale serbe ndaj trupave të KFOR-it, Policisë së Kosovës dhe gazetarëve në terren.
Ai ka thënë se është koha që dhunës t’i përgjigjemi me një zë të përbashkët, shkruan teve1.info
“Shpreh solidaritetin tim personal dhe institucional për 25 ushtarët e plagosur të misionit paqeruajtës dhe uroj shërim sa më të shpejtë!
Është koha që dhunës t’i përgjigjemi me një zë të përbashkët. Ajo nuk mund të tolerohet”, ka shkruar ai.
Numri i pjesëtarëve të KFOR-it të lënduar dje gjatë protestave në Zveçan ka shkuar në 30. Sipas njoftimit të tyre, 11 ushtarë nga kontingjenti italian dhe 19 nga kontingjenti hungarez kanë pësuar lëndime të shumta, duke përfshirë thyerje dhe djegie nga mjetet ndezëse shpërthyese të improvizuara.
Tre ushtarë hungarezë u plagosën nga përdorimi i armëve të zjarrit, teksa bëhet e ditur se lëndimet e tyre nuk janë të rrezikshme për jetën.
