Dorëheqja e Memli Krasniqi i la pa një udhëheqës.
E për ta zgjedhur atë, kryesia e Partisë Demokratike të Kosovës kanë thirrur Konventë për të hënën.
Por dikush brenda partisë po vlerëson se kjo Konventë duhet që të shtyhet për së paku edhe 1 javë.
Anëtari i kryesisë së PDK-së, Enver Hoxhaj është shprehur se një parti serioze, siç ka thënë ai, nuk mund të mbajë një konventë politike dhe përmbajtësore në një kohë kaq të shkurtër.
“Kërkoj nga Kryesia e PDK-së shtyrjen e Konventës për të paktën deri të dielën e ardhshshme, sepse kështu do u jepej mundësia anëtarësisë dhe delegatëve të njihen me kandidaturat dhe platformat për zhvillimin e partisë dhe për çështje serioze që prekin vendin. Kjo do ta rriste cilësinë e kandidaturave dhe konkurrencën ndërmjet platformave, pasi zhvillimet e fundit kanë qenë të befasishme”, thuhet nga PDK-ja.
E në anën tjetër, sekretarja e PDK-së, Vlora Çitaku bëri të ditur se sipas nenit 35 të Statutit të partisë, Konventa e jashtëzakonshme duhet të mbahet brenda 5 ditësh.
Për tëvë1, ajo theksoi se çdo anëtar që plotëson kriteret, është i mirëpritur të kandidojë për postin e kryetarit.
“Ne e inkurajojmë dhe e mirëpresim garën e brendshme. Çdo anëtar apo anëtare që i plotëson kriteret e përcaktuara me Statut është i mirëseardhur të kandidojë. Gara do ta bënte Konventën edhe më madhështore”, tha Çitaku.
Pjesëmarrjen në mbledhjen e së hënës së kësaj partie e konfirmoi deputeti i saj, Nait Hasani.
Krejt këtë situatë në PDK, analisti politik Avni Arifi po e sheh si proces të vështirë.
“Kur je në një propozim të tillë do duhej në rrethana normale, mirëpo në rrethana ku brenda një muaji mund të kemi zgjedhje, nuk e di e a i ndihmon Partisë Demorkatike të Kosovës një vendim i tillë. Me hy në zgjedhje pa një kryetar është bukur proces i vështirë”.
Deri tani, kandidaturën e ka bërë publike Bedri Hamza.
Memli Krasniqi, ditë më parë dha dorëheqje nga posti i kryetarit të PDK-së, post të cilin e mori në vitin 2021.
Largimin e tij, ai e ka cilësuar si rrugë më të duhur për PDK-në.
