Është hera e dytë që vjen në gjykatore për qëllimin e njëjtë.
Muhamet Alidemaj erdhi ta dëgjoj për së afërmi verdiktin e rigjykimit nga Gjykata për akuzat për krime lufte.
Për pjesëmarrje në krimet makabre të masakrës së Izbicës, Alidemaj herë e parë mori dënimin maksimal me 15 vite burgim.
Në rigjykim, dënimi atij iu ulë për dy vite.
“Muhamet Alidemaj e shpallë fajtor dhe e gjykon me dënim burgu në kohëzgjatje prej 13 vitesh”, tha kryetari I trupit gjykues Vesel Ismaili.
Edhe ndaj këtij vendimi, Alidemaj ka të drejtë ankese.
Andaj, deri sa vendimi ta marrë formën e prerë, ai do të vazhdojë të qëndrojë në paraburgim.
“I vazhdohet masa e paraburgimit deri në plotfuqishmërinë e këtij aktgjykimi, por jo më tepër se sa dënimi i shqiptuar”, tha ai.
Vendimi i Gjykatës, që nga 15 vite e dënoi me 13 vite burgim, nuk u prit mirë nga familjarët e viktimave.
“Bab të dikujt, vllazën të dikujt e motra të dikujt. Njerëz, jo shtazë. 137”, tha Islam Dani familjar i viktimave.
Përpos Alidemaj, Dani thotë se ka edhe shqiptarë të tjerë të përfshirë në masakrën e Izbicës, identitetin e të cilëve nuk dëshiron ta zbulojë deri sa ata të kapen prej drejtësisë.
“Edhe për këto e kom ditë shumë mirë, po kurrë emër deri atë ditë që ka ardhë n’Kosovë që u ardhë, s’kom dashtë me dhanë emër. Kur u ardhë n’Kosovë, u arrestu. As për këta s’du me dhanë emër. Nëse vijnë, do t’i gjejë fati i këtij”, u shpreh Dani.
Muhamet Alidemaj akuzohet se si pjesëtar i forcave policore dhe ushtarake serbe, nga 24 marsi i 1998 e deri më 11 qershor 1999 bashkë me persona të tjerë të paidentifikuar, me dhunë i ndau gratë e fëmijët dhe i detyruan të shkojnë në drejtim të Shqipërisë.
Sipas aktakuzës së prokurorisë, në këtë rast u ekzekutuan 114 burra, ku dy muaj më pas trupat e tyre u zhvarrosën nga ushtria e policia serbe dhe u transportuan në drejtim të panjohur.
