Mbrojtësi austriak Albert Vallçi është shumë pranë një transferimi te Sturm Graz, duke i dhënë fund aventurës së tij me St. Gallen në Zvicër. 30-vjeçari nuk ishte më pjesë e planeve kryesore të trajnerit Enrico Maassen gjatë këtij sezoni, ku aktivizohej kryesisht si alternativë.
Vallçi iu bashkua St. Gallenit në verën e vitit 2022 nga RB Salzburg dhe u imponua menjëherë si titullar i padiskutueshëm në mbrojtje. Megjithatë, në edicionin aktual situata ndryshoi ndjeshëm, pasi ai u aktivizua vetëm në 14 ndeshje, shumicën prej tyre jo nga minuta e parë.
Sipas raportimeve të Sky, mbrojtësi austriak është pranë kalimit te Sturm Graz, skuadra që aktualisht renditet e treta në Bundesligën austriake. Ky transferim vjen si reagim i klubit nga Grazi ndaj largimit të Tim Oermann, i cili në fillim të shkurtit u rikthye te klubi i tij mëmë, Bayer Leverkusen.
Nga ana tjetër, St. Galleni duket i përgatitur për largimin e Vallçit. Klubi zviceran, që gjithashtu renditet në vendin e tretë në Superligë, ka përforcuar repartin defensiv që në afatin e janarit me afrimin e mbrojtësit Colin Kleine-Bekel.
