“Janë dhjetë minuta dhe bomba e vendosur do të shpërthejë”.
Ky ishte mesazhi që Kuvendi i Kosovës pranoi të shtunën nga një telefonatë në gjuhën angleze.
Për këtë, u anulua edhe seanca e 42-të me radhë për konstituim të Kuvendit, e cila ishte paraparë të niste në orën 11:00.
Kërcënimi më pas, doli të jetë i rrejshëm.
E seanca u shtye për në mbrëmje.
Por, a u shkel rregullorja e punës së Kuvendit pasi seanca nuk u mbajt pas 48 orësh?
E në anën tjetër, e gjithë kjo situatë e krijuar po vlerësohet se nuk duhet të injorohet.
Njohësi i sigurisë, Avni Islami thotë se ky mesazh kishte për qëllim të krijojë frikë te deputetët.
“Duhet thënë se asnjë mesazh kërcënues nuk duhet të injorohet, pavarësisht nga vjen, dhe forma se si dërgohet mesazhi institucionet e sigurisë duhet ta kryejnë punën e vet, pavarësisht a gjendet bomba ose është një mesazh i rrejshëm. Në kuvend kanë ardhë shumë kërkesa për konstituim të Kuvendit, unë mendoj se pala e tretë ka mundur që shumë lehtë ta shfrytëzoj këtë rast të përcjellë ndonjë mesazh nga ndonjë vend i tretë për të krijuar frikë dhe pasiguri për deputetët dhe administratën”, tha Islami.
Ngjashëm mendon edhe eksperti tjetër i sigurisë, Nuredin Ibishi.
“Çdo kërcënim është serioz, nuk ka lojë. Aty mund të ndodhin 99 kërcënime, i 100-ti mund të jetë fatal. Duhet të merret me seriozitet dhe kjo është kërcënim, nuk është për t’u gjykuar. Por realiteti është që këta deputetë anarkista me këto veprimet e tyre jo vetëm që përbëjnë shkelje administrative në kuptimin e përgjegjësisë disiplinore sa i përket përgjegjësisë së deputetit, kjo ka të bëjë me çështjen e detyrës së tyre”, tha Ibishi.
Për këtë rast, hetime ka filluar edhe Prokuroria Themelore në Prishtinë.
