Prokuroria Themelore në Pejë ka ngritur aktakuzë ndaj tre personave, të identifikuar me inicialet S.D., R.R. dhe B.T., nën dyshimin për përfshirje në vepra penale që lidhen me narkotikët dhe korrupsionin.
Sipas Prokurorisë, i pandehuri S.D., në cilësinë e zyrtarit korrektues në Qendrën Korrektuese në Dubravë, dyshohet se ka tentuar të fusë brenda institucionit 85.61 gram marihuanë, të cilën e kishte fshehur në trup. Lënda narkotike është zbuluar gjatë një kontrolli të zyrtarëve korrektues, pas pranimit të informatave operative.
Ndërkohë, i pandehuri R.R., i cili në kohën e ngjarjes ishte duke vuajtur dënimin në Qendrën Korrektuese në Dubravë, dyshohet se ka organizuar dhe koordinuar futjen e substancës narkotike në burg, duke nxitur të pandehurit e tjerë ta kryenin veprën në këmbim të një shpërblimi financiar.
Sipas aktakuzës, B.T. dyshohet se ka siguruar dhe dorëzuar marihuanën me qëllim që ajo të futej në institucionin korrektues. Ai po ashtu akuzohet se i ka ofruar 1 mijë euro zyrtarit korrektues për ta nxitur të vepronte në kundërshtim me detyrën zyrtare, duke mundësuar futjen e narkotikëve në burg.
S.D. dhe B.T. akuzohen për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, ndërsa R.R. akuzohet për shtytje në kryerjen e kësaj vepre. B.T. përballet gjithashtu edhe me akuzën për “Dhënie të ryshfetit”.
Prokuroria i ka propozuar gjykatës që pas zhvillimit të shqyrtimit gjyqësor dhe administrimit të provave, të pandehurit të shpallen fajtorë dhe të dënohen sipas ligjit.
Për zyrtarin korrektues S.D., Prokuroria ka kërkuar edhe shqiptimin e dënimit plotësues “Ndalimi i ushtrimit të funksioneve në administratën publike ose në shërbimin publik”, në përputhje me Kodin Penal të Republikës së Kosovës./teve1.info/
