Prokuroria Speciale e Republikës së Kosovës ka ngritur aktakuzë ndaj të pandehurit me inicialet I.K., për veprën penale “Nxitje e përçarjes dhe mosdurimit”.
Sipas njoftimit të Prokurorisë Speciale, i pandehuri dyshohet se më 16 prill 2026, përmes rrjetit social Facebook, me dashje ka ndërmarrë veprime që kanë pasur për qëllim nxitjen dhe përhapjen publike të urrejtjes dhe mosdurimit ndërmjet grupeve fetare.
Në aktakuzë pretendohet se përmes këtyre veprimeve është përhapur publikisht urrejtje dhe mosdurim ndërmjet komuniteteve fetare, duke cenuar bashkëjetesën ndërfetare në Republikën e Kosovës dhe duke rrezikuar rendin dhe qetësinë publike.
Rasti do të shqyrtohet nga Gjykata Themelore në Prishtinë, e cila do të vendosë lidhur me akuzat e ngritura.
I pandehuri konsiderohet i pafajshëm derisa fajësia e tij të vërtetohet me vendim të formës së prerë nga gjykata.
