Prokuroria Themelore në Prishtinë, Departamenti i Krimeve të Rënda, përmes Njësisë për Hetimin e Krimeve Ekonomike dhe Korrupsionit, ka ngritur aktakuzë ndaj të pandehurve R.N. dhe H.D., nën dyshimin e bazuar mirë se, secili veç e veç, kanë kryer veprën penale “Përvetësimi në detyrë”.
Sipas aktakuzës, i pandehuri R.N., gjatë periudhës 2022–2026, në cilësinë e personit zyrtar, i angazhuar si rojtar në Agjencinë e Pyjeve të Kosovës, në Njësinë Pyjore Blinaj në Lipjan, dyshohet se me dashje dhe me qëllim të përfitimit të kundërligjshëm të dobisë pasurore për vete apo për person tjetër, ka përvetësuar pasurinë që i ishte besuar për shkak të detyrës apo pozitës së tij.
Konkretisht, sipas Prokurorisë, pas përfundimit të detyrës zyrtare me rastin e pensionimit, R.N. nuk e ka kthyer apo dorëzuar armën zyrtare të gjahut, të modelit “Over/Under”, e cila ishte pronë e Agjencisë së Pyjeve të Kosovës.
Në anën tjetër, i pandehuri H.D., sipas aktakuzës, gjatë periudhës 2019–2026 ka shërbyer si rojtar në Agjencinë e Pyjeve të Kosovës, në Njësinë Pyjore Blinaj në Lipjan.
Ai dyshohet se, me qëllim të përfitimit të kundërligjshëm të dobisë pasurore për vete, ka përvetësuar pasurinë që i ishte besuar për shkak të detyrës.
Sipas aktakuzës, pas përfundimit të marrëdhënies së tij të punës, me rastin e shkarkimit, H.D. nuk e ka dorëzuar armën zyrtare të gjahut të modelit “Pump Action Shotgun”.
Prokuroria pretendon se me këtë veprim i është shkaktuar dëm i konsiderueshëm material Agjencisë së Pyjeve të Kosovës.
Prokurori i çështjes, me rastin e ngritjes së aktakuzës, i ka propozuar gjykatës që, pas mbajtjes së shqyrtimit gjyqësor, administrimit dhe vlerësimit të provave, të dy të pandehurit të shpallen fajtorë dhe të dënohen sipas dispozitave ligjore në fuqi./teve1.info/
