Inspektorët e Agjencisë së Ushqimit dhe Veterinarisë të premten dolën në aksion.
Cak i tyre që fabrika e përpunimit të qumështit “Vita” në Istog.
Për të treguar se si ka shkuar procesi, të shtunën AUV mbajti konferencë për media.
E sipas Shefit të Inspektoratit Veterinar Kufitar në AUV, Eroll Shehu, është kryer në bashkëpunim me njësitet e tjera inspektuese.
EROLL SHEHU- SHEF I INSPEKTORATIT VETERINAR KUFITAR NË AUV 00:05-00:50
“Në vazhdën e kontrolleve gjatë datës 2 korrik në subjektin, ose fabrikën e përpunimit të qumështit ‘Vita’ në Istog, është bërë procesi i inspektimit të përbashkët me njësitë tjera inspektuese në subjekt. Inspektimi është bërë sipas kërkesës së vendimit të ministrit, i cili është zbatuar gjatë ditës, domethënë gjatë orarit. Sa i përket ciklit të inspektimit, inspektimi ka shkuar gjithmonë shumë transparent. Këtë herë të gjithë kohën i kemi pasur kamerat rreth vetes dhe tani jemi në proces të pritjes së rezultateve nga laborator”, deklaroi Eroll Shehu, shef i inspektoratit veterinar kufitar në AUV.
Ndërsa se çfarë hasën gjatë këtij aksioni, pak nga detajet ndau Durak Zyrapi, Udhëheqës i Zyrës së AUV në Prizren.
“Ne si komision kemi konstatuar, në bazë të gjetjeve të inspektorëve që kanë qenë në terren, se subjekti në fjalë ka thyer vendimin e ministrit, ku ndalohet përdorimi i qumështit pluhur, vajit të palmës, hirrës dhe gjërave të tjera në fabrikat e përpunimit të qumështit. Ky ka qenë konstatimi fillestar i komisionit”, theksoi Durak Zyrapi, udhëheqës i zyrës së AUV në Prizren.
I njëjti theksoi se jo të gjithë anëtarët e komisionit kanë qenë të pranishëm gjatë inspektimit.
“Për hir të korrektësisë së opinionit dhe disa portaleve që po shkruajnë se kemi qenë të gjithë prezent në inspektim, kjo nuk është e vërtetë. Unë personalisht, edhe pse jam kryesues i komisionit të monitorimit, nuk kam qenë në inspektim faktikisht brenda, kam qenë jashtë zyrave. Edhe pesë zyrtarë të tjerë të ministrisë nuk kanë qenë pjesë e këtij zhvillimi. Të tjerët që kanë qenë kompetentë dhe që vijnë nga fushat përkatëse kanë kryer inspektimin dhe na kanë paraqitur konstatimet e tyre”, theksoi ai.
Ndryshe kujtojmë se fabrika e qumështit “VITA”, ka vendosur që pas këtij inspektimit të AUV të mbyllë fabrikën për një afat shtatëditor.
