Aksioni në NPB Prishtina, bastisën pronat e 11 zyrtarëve

Policia e Kosovës së bashku me Prokurorinë Speciale kanë i kanë bastisur 12 lokacione të ndryshme, prona të të dyshuarve; H.H, V.M, D.K, L.M, XH.L, A.J, G.SH, B.P, A.M, B.B dhe D.B, të dyshuar për keqpërdorim të pozitës apo autoritetit zyrtar, raporton teve1.info

Teve1.info merr vesh se bastisja ka ndodhur në pronat e zyrtarëve të NPB Prishtina, në zyrat e të cilës kishte filluar aksioni policor në mëngjes.

Sipas komunikatës për medie, dyshohet se përmes keqpërdorimit të detyrës zyrtare, lidhjes së kontratave të dëmshme dhe mashtrimit, të dyshuarit kanë keqpërdorur 120 milionë Euro.

“Prokuroria Speciale njofton se kontrolli është realizuar në pronat e të dyshuarave H.H, V.M, D.K, L.M, XH.L, A.J, G.SH, B.P, A.M, B.B dhe D.B. të cilët në cilësinë e personave zyrtar, dyshohet se kanë kryer veprën penale “Keqpërdorim i pozitës apo autoritetit zyrtar” nga neni 414 i KPRK-së; “Lidhja e kontratës së dëmshme” nga neni 285 i KPRK-së; dhe “Mashtrimi” nga neni 323 i KPRK-së.

Gjithashtu, ekziston dyshimi i arsyeshëm se është keqpërdor detyra zyrtare, nga zyrtarët e përfshirë në këtë proces, nga faktet se si janë zhvilluar procedurat e përshpejtuara për ndërtimin e katër objekteve afariste dhe banesore, vlera e të cilave kalon njëqindenjëzet milion (120.000.000) euro”, thuhet në komunikatën e Prokurorisë Speciale.

Sipas njoftimit, gjatë bastisjes, janë sekuestruar prova materiale: 17 dosje dhe dokumente që ndërlidhen me rastin, 6 lap-topë, 2 shtëpiza, 11 telefona, 2 sim card dhe 6 usb.

Në mëngjes, Policia e Kosovës ka njoftuar se është duke e zhvilluar një aksion në zyrat e Ndërmarrjes Publike Banesore Prishtina në Prishtinë.

Këtë lajm e kishte demantuar Arbnor Neziri nga kabineti i Kryeshefit Ekzekutiv i Ndërmarrjes Publike Banesore.

“Duam të sqarojmë se nuk ka pasur asnjë bastisje në Ndërmarrjen Publike Banesore deri në momentin e komunikatës, megjithatë nuk e përjashtojmë mundësinë që të ketë pasur një bastisje tek zyrtaret apo ish zyrtarët e NPB-së”, ka bërë të ditur Neziri për KP.

Lidhur me aksionin kishte reaguar edhe Partia Socialdemokrate, anëtari i së cilës, Dren Kukaj, është një ndër aksionarët e NPB Prishtina.

Kukaj po ashtu bëri të ditur se i është bastisur banesa e tij.