Një aksion i gjerë hetimor është duke u zhvilluar në Kosovë, në lidhje me dyshimet për veprën penale të spiunazhit. Lajmin e ka bërë të ditur Prokuroria Speciale, e cila ka konfirmuar se operacioni është duke u udhëhequr nga kjo prokurori, në bashkëpunim me Inspektoratin Policor të Kosovës dhe Agjencinë e Kosovës për Inteligjencë (AKI).
Sipas njoftimit zyrtar, operacioni është ende në zhvillim dhe për shkak të ndjeshmërisë së hetimeve, autoritetet nuk kanë dhënë detaje shtesë për momentin.
“Operacioni është ende në zhvillim dhe për shkak të ndjeshmërisë së hetimeve, më shumë detaje do të bëhen publike pas përfundimit të operacionit”, thuhet në komunikatën e Prokurorisë Speciale.
Gjithashtu, është bërë e ditur se Prokurori i Shtetit do të ndërmarrë të gjitha veprimet e nevojshme hetimore, në përputhje me ligjet në fuqi.
Hetimet pritet të zbardhin nëse ka pasur rrjedhje të informacionit të ndjeshëm dhe kush qëndron pas këtyre veprimeve të dyshuara.
