Një nga atraksionet më të njohura turistike të kryeqytetit portugez, tramvaji i famshëm Gloria, ka dalë nga shinat të mërkurën mbrëma duke shkaktuar një tragjedi me të paktën 17 viktima dhe mbi 20 të lënduar, disa prej tyre në gjendje kritike. Fillimisht u raportuan 15 të vdekur, por shifra është rritur një ditë më pas.
Si ndodhi aksidenti?
Ngjarja e rëndë u regjistrua rreth orës 18:15, pranë Avenida da Liberdade në qendër të Lisbonës. Menjëherë u aktivizua një reagim i madh emergjent me mbi 60 punonjës dhe 22 automjete të vendosura në terren.
Shkaku i saktë i aksidentit ende nuk është përcaktuar. Sipas gazetës portugeze Observador, dyshohet se një kabllo u shkëput përgjatë linjës, duke bërë që vagoni të humbte kontrollin dhe të përplasej me një ndërtesë. Pamjet nga vendngjarja tregojnë tramvajin e verdhë të përmbysur në rrugën me kalldrëm, ndërsa tymi mbulonte zonën dhe banorët largoheshin me panik.
Disa udhëtarë mbetën të bllokuar nën rrënoja dhe u desh ndërhyrja e ekipeve të shpëtimit për t’i nxjerrë.
Autoritetet konfirmojnë se mes viktimave dhe të plagosurve ka edhe shtetas të huaj, por ende nuk dihet saktësisht kush ndodhej në bord apo kush u lëndua në rrugë.
Mediat lokale raportojnë se një fëmijë trevjeçar po trajtohet në spital, ndërsa nëna e tij shtatzënë është transferuar në maternitet.
Tramvaji Gloria ka kapacitet për rreth 40 pasagjerë, por numri i personave që ndodheshin në bord gjatë aksidentit mbetet i paqartë.
Çfarë është tramvaji Gloria?
I hapur që në vitin 1885 dhe i elektrifikuar tre dekada më vonë, Gloria është një sistem unik hekurudhor që ngjitet dhe zbret në shpatet e pjerrëta të Lisbonës. Ai lidh sheshin Restauradores me lagjen Bairro Alto në një udhëtim prej vetëm tre minutash në një distancë prej 275 metrash.
Dy vagonët funksionojnë përmes një mekanizmi kabllor: ndërsa njëri zbret poshtë kodrës, pesha e tij tërheq tjetrin lart. Ky sistem është jo vetëm thelbësor për banorët lokalë, por edhe një magnet për turistët që vizitojnë qytetin.
Reagimet
Fabiana Pavel, presidente e një shoqate të banorëve të Lisbonës, tha në një intervistë për BBC Radio 4 se komuniteti është i tronditur nga kjo ngjarje.
“Është një shok i madh për qytetin tonë,” u shpreh ajo.
