Dy persona kanë kërkuar ndihmë mjekësore pas një aksidenti trafiku të ndodhur në autostradën “Ibrahim Rugova”, në drejtimin Prizren–Prishtinë.
Kështu ka konfirmuar për tëvë1.info zëdhënësi i Policisë së Kosovës, Bajram Krasniqi, i cili ka bërë të ditur se në këtë aksident është përfshirë vetëm një automjet.
Ai ka thënë se Njësia e trafikut në autostradë është marrë me procedurat në vendin e ngjarjes, ndërsa njëri shirit i lëvizjes është bllokuar përkohësisht.
“Në ora 09:30, policia është njoftuar për një aksident trafiku. Aksidenti ka ndodhur në autostradë drejtimi Prizren-Prishtinë (kilometri i 51-të). Në aksident është përfshirë vetëm një automjet. Si pasojë e aksidentit, dy persona kanë kërkuar ndihmë mjekësore. Njësia e trafikut e autostradës është marrë me procedurat në vendin e ngjarjes. Njëri shirit i lëvizjes është bllokuar përkohësisht”, ka deklaruar Krasniqi./teve1.info/
