Kandidati për kryetar të Komunës së Graçanicës nga Aleanca Shqiptare, Leutrim Ajeti ka prezantuar programin e tij zgjedhor duke theksuar se ai është i ndërtuar mbi nevojat reale të të gjithë qytetarëve, pa dallim etnie.
Sipas Ajetit, prioritet do t’i jepet zhvillimit infrastrukturor, përmirësimit të shëndetësisë dhe mbrojtjes së ambientit.
“Në programin tonë kemi trajtuar tri çështje kyçe që janë kërkuar me ngulm nga komuniteti serb: ndërtimi i një nënkalimi në qendër të Graçanicës, një shesh modern mbi të, si dhe hapësira të mjaftueshme për parkim”, deklaroi Ajeti.
Në sektorin e shëndetësisë, Ajeti premtoi ndërtimin e spitalit që ka mbetur i papërfunduar prej një dekade.
“Te sektori i shëndetësisë do të ndërtojmë spitalin i cili është nisur që 10 vite dhe ka mbetur pa u ndërtuar, aty do ta realizojmë brenda 4 vitesh, do të kemi spitalin në Graqanicë, në bazë të nevojave do të ndërtojmë edhe shtëpitë e shëndetit në bazë të vendbanimeve. Ky spital do të ndërtohet brenda 4 vitesh. Po ashtu, do të hapen shtëpi të shëndetit në vendbanime të ndryshme, sipas nevojave të qytetarëve”, tha ai.
Ajeti është shprehur i bindur se qytetarët e Graçanicës nuk e kanë problem që Ajeti të zgjidhet kryetar i tyre.
“Unë besoj se qytetarët serbë, romë, boshnjakë e ashkalinj nuk do ta kenë aspak problem që unë të jem kryetari i tyre – ata presin rezultate dhe zhvillim”, deklaroi Ajeti në emisionin “Ditari” në Tëvë1./teve1.info/
