Kandidatja e PDK-së për deputete, Mimoza Ahmetaj ka thënë se programi i PDK-së është program i rikthimit të shpresës, i cili i dedikohet qytetarit të Kosovës.
Ahmetaj e quan impresive listën e PDK-së e cila përbëhet nga 60 deputet të rinj me eksperiencë në politikë të cilët kandidojnë për herë të parë.
“Mendoj që Kosova dhe Kuvendi i Kosovës ka nevojë në vazhdimësi që të ketë struktura dhe deputetit dhe deputeteve të cilat ende mund t`i japin Kosovës, sigurisht e kam përvojën e gjatë si në politikë dhe në diplomaci. Është impresive kur shihet lista e PDK-së përbëhet nga burra dhe gratë të cilët janë të dëshmuar si edhe nga dikund 60 deputet të rinj të cilët kandidojnë për herë të parë të cilët jo domosdo janë të rinj me moshë, por janë të rinj me eksperiencë në politikë që tregon që gjithë këta i kanë besuar idesë dhe programit të PDK-së. Në mënyrë që ta ndalojmë së pari numrin e madh të mjekëve të cilët janë duke e lëshuar vendin ne synojmë që t`ua rrisim pagat dhe që vendin e tyre të punës të jenë atraktive në Kosove”, ka deklaruar Ahmetaj.
Më tej, Ahmetaj tregon se programi qeverisës i PDK-së përbëhet nga arsimi, shëndetësia, mirëqenia sociale, zhvillimi ekonomik dhe siguria.
“Programi i Partisë Demokratike të Kosovës është program i rikthimit të shpresës, është program i cili i dedikohet qytetarit të Kosovës pavarësisht orientimit politik që ai e ka është program i unitetit, është program i cili bazohet në shtyllat kryesore të qeverisjes së një vendi apo të them shtyllat kryesore të cilat janë sfidë dhe brengat e qytetarëve të Kosovës, siç është arsimi, shëndetësia, mirëqenia sociale, zhvillimi ekonomik si dhe siguria”, tha ajo.
Ndryshe, ajo akuzon Kurtin për këto pesë vite qeverisje, që sipas saj ka pas afera të korrupsionit.
“Mendoi që data 9 shkurt do të jetë dita e gjykimit ajo e cila do të definojë dhe do t`a qojë Kurtin në shtëpi pikërisht sepse do të jetë shpërblimi të cilin ai e meriton sepse në këto pesë vite të qeverisjes nuk është bërë fare asgjë, përkundrazi ne kemi parë afera të pafundme të korrupsionit, rritje e çmimit të energjisë elektrike, të çmimeve të konsumit të përditshme, qytetarët e Kosovës nuk kanë barna të mjaftueshme janë të detyruar të marrin trajtim e duhur adekuat”, theksoi Ahmetaj.
E pyetur për mospjesëmarrjen e zyrtareve të lartë shtetëror në ceremoninë e inaugurimit të presidentit Donald Trump, Ahmetaj thotë se është dëshmitare e deklaratës së Hovenierit që ka thënë se “ Po t`kishim qenë në raporte të mira, shumëçka do të ishte arritur”.
“Ceremonia e djeshme në të vërtetë e përmbledh apo të them është rezyme e të gjitha raporteve që për këto vjet të qeverisjes kjo qeverisje i ka pasur raportet me ShBA-të dhe fakti që asnjë prej zyrtarëve të lartë shtetëror nuk janë ftuar të marrin pjesë në ceremoninë e inaugurimit të presidentit Trump, ne jemi dëshmitar të deklaratës së Hovenierit të cilit në fund të misionit të tij e konfirmon një gjë të tillë kur thotë që “ Po t`kishim qenë në raporte të mira, shumëçka do të ishte arritur”, ka deklaruar Ahmetaj./teve1.info/
