Promotori dhe trajneri i shqiptar i boksit në Gjermani, Agron Kurtishi, të shtunën do të organizoi eventin e madh të boksit profesionist, në Munich të Gjermanisë.
Ky do të jetë eventi i 20-të që Kurtishi e organizon në shtetin gjerman.
“Ring of Fire 20”, kështu është titulluar ngjarja e 28 qershorit që mbahet në Unterschleisshein Bayern.
Të shtunën katër boksierë shqiptarë do të ngjiten në ring. Të gjithë janë nxënës të trajnerit Kurtishi dhe akademisë së tij të boksit “Power Academy”.
Sami Ahmeti do të luftojë për titull WBC Junior, Granit Shala kërkon titullin WBA Continental, kurse meçe të rëndësishme drejt ngritjes në boksin profesionist do të zhvillojnë edhe Kelmend Halili dhe Shpejtim Rullani. Po ashtu, në këtë event do të paraqiten edhe Besart Aliu dhe Besmir Helshani në K1.
Aliu lufton për titull ROF K1, 5 raunde nga tre minuta, kurse Helshani në Superfight K1, 3 raunde nga tre minuta.
Trajneri Kurtishi në moshë të re është zhvendosur në Gjermani nga Maqedonia e Veriut dhe që dy dekada ka arritur shumë suksese në boksin profesionist.
Ai është në krye të A.K Promotion dhe Fight Power Academy.
