Asociacioni i Gazetarëve të Kosovës (AGK), ka shprehur shqetësim për nisjen e hetimeve nga Prokuroria Themelore e Prishtinës ndaj gazetarëve Vehbi Kajtazi dhe Lirim Mehmetaj për zbulimin e identitetit të zyrtarëve të Agjencisë së Kosovës për Inteligjencë (AKI).
Në njoftim thuhet se, AGK të enjten i ka dërguar një letër Kryeprokurorit të Prokurorisë Themelore të Prishtinës përmes së cilës ka kërkuar sqarim lidhur me këtë rast, si dhe ka kërkuar një takim për të diskutuar këtë dhe për të mbrojtur të drejtat e gazetarëve.
“AGK-ja është thellësisht e shqetësuar për këtë situatë dhe kërkon që të sigurohet se këto hetime nuk janë të motivuara politikisht, si dhe që liria e shprehjes dhe e medias të respektohen në tërësi”, thuhet në njoftim.
Po ashtu, AGK bën të ditur se do të vazhdojë të monitorojë nga afër këtë zhvillim, ndërsa ka ftuar të gjitha palët e përfshira të mos i shkelin parimet demokratike dhe që në asnjë formë të mos cënohet liria e shprehjes, e gazetarëve, e mediave dhe e drejta për informim.
Të mërkurën, kryeprokurori i Prishtinës, Zejnullah Gashi, ka konfirmuar se prokuroria ka nisur hetime penale ndaj dy gazetarëve Vehbi Kajtazi dhe Lirim Mehmetaj.
“Po, kanë nisur hetimet. Rasti i është ndarë një prokurori”, ka thënë Gashi.
Ndërsa, Kajtazi lidhur me hetimet që po zhvillohen ndaj tij dhe gazetarit Lirim Mehmetaj, ka thënë se rasti është iniciuar nga AKI-ja përmes një raporti që agjencia i ka dërguar ushtruesit të detyrës së Kryeprokurorit të Shtetit, Besim Kelmendi.
“Kelmendi, këtë shkresë që kërkohet burgim për mua dhe Lirimin, ia ka dorëzuar Prokurorisë Themelore në Prishtinë”, ka shkruar ai në rrjetin social ‘Facebook’ të martën./teve1.info/
