Asociacioni i Gazetarëve të Kosovës i ka drejtuar një kërkesë publike Presidentit të Këshillit Evropian, António Costa, duke i kërkuar që gjatë vizitës së tij në Kosovë të diskutojë me kryeministrin në detyrë, Albin Kurti, për respektimin e lirisë së medias dhe të shprehjes.
Në reagimin e saj publik, AGK-ja, e cila përfaqëson mbi 700 gazetarë në Kosovë, ka shprehur shqetësimin për gjendjen e lirisë së medias në vend, duke theksuar se vitet e fundit është shënuar një rënie e konsiderueshme në këtë fushë, e reflektuar edhe në raportet e organizatave ndërkombëtare.
Sipas AGK-së, Qeveria e Kosovës dhe partia në pushtet janë përfshirë në fushata të vazhdueshme denigruese ndaj gazetarëve dhe punonjësve të mediave, duke krijuar një klimë më të vështirë për ushtrimin e profesionit të gazetarisë.
Organizata po ashtu ka ngritur shqetësime lidhur me pavarësinë e institucioneve mediale, duke përmendur Komisioni i Pavarur i Mediave dhe Radio Televizioni i Kosovës, për të cilat pretendon se janë vënë nën ndikim politik përmes proceseve të emërimeve të bordeve.
AGK-ja shpreson që Presidenti Costa do t’ia rikujtojë kryeministrit Kurti rëndësinë e respektimit të lirisë së medias si një nga vlerat themelore demokratike dhe një kriter i rëndësishëm në rrugën e integrimit të Kosovës drejt Bashkimi Evropian.
Në fund të reagimit, Asociacioni i Gazetarëve të Kosovës ka theksuar se mediat dhe gazetarët vazhdojnë të luajnë një rol të pazëvendësueshëm në informimin e publikut dhe në forcimin e demokracisë, duke kërkuar mbështetje për mbrojtjen e lirisë së shprehjes dhe të gazetarisë së pavarur në vend./teve1.info/
