Asociacioni i Gazetarëve të Kosovës e ka quajtur të rrezikshme një deklaratë të anëtarit të Lëvizjes Vetëvendosje në Komisionin Qendror të Zgjedhjeve, Sami Kurteshi, i cili i sulmoi mediat gjatë një konference për media për rastin e vdekjes së Astrit Deharit.
“Deklarata të rrezikshme të Sami Kurteshit të Vetëvendosjes ndaj medieve. Anëtari i Vetëvendosjes në KQZ, Sami Kurteshi, ka sulmuar mediet gjatë një prononcimi sot për rastin e aktivistit të kësaj partie, Astrit Dehari. Kurteshi ka akuzuar Klan Kosovën, Expressin dhe RTK-në: “për rol negative dhe dezinformues, sidomos me nxjerrjen e xhirimeve të paautorizuara. Në atë kohë RTK-ja mbulonte gjithë propagandën kundër Lëvizjes Vetëvendosje dhe arsyetonte arrestimet”“, thuhet në njoftimin e AGK-së.
Tutje, në njoftim thuhet se deklarata të tilla vënë në rrezik sigurinë e gazetareve të këtyre tri medieve dhe janë të papranueshme.
“Kjo, është një deklaratë e papërgjegjshme dhe e rrezikshme e Kurteshit, që akuzon mediet në lidhje me rrethanat e vdekjes në burg të Deharit. Deklarata të tilla vënë në rrezik sigurinë e gazetarëve të këtyre tri medieve, dhe janë të papranueshme. Rasti Dehari ishte dhe mbetet me interes të lartë për publikun, dhe në atë kohë specifikat e atij rasti ishin ndarë në detaje nga vetë Lëvizja Vetëvendosje“, thuhet në njoftim
“Xhirimet e publikuara nga mediat kanë zbuluar rrethanat e ngjarjes në qendrën e paraburgimit ku pritej siguri e lartë, dhe ka kontribuar në informimin e publikut“, përfundon njoftimi.
Kurteshi: Kishte urdhër politik nga maja e shtetit për vrasjen e Deharit