Janë ndër të parët që i hapin qendrat e votimit.
Punëtorët teknik, përveç punës që bëjnë gjatë javës në shkolla, angazhohen edhe në ditën e zgjedhjeve.
Por një numër nga ta, nuk janë paguar për punën që kanë kryer.
Në kushte anonime, një nga punëtorët teknik në Fushë Kosovë ka treguar që nuk i ka marrë mjetet për zgjedhjet e nëntorit e as të dhjetorit.
“Kam punu në zgjedhjet e kaluara, kam ardhë e kam ndezë kaldajën dhe jam kujdes për mirëmbajtjen e qendrës së votimit, por nuk kam marrë asnjë cent. Mua më kanë mbet në borxh për dy palë zgjedhjet e kaluara, për balotazh dhe zgjedhjet e 28 dhjetorit, pra afër 120 euro. Kam shku në Komunë, më kanë thanë se janë në proces”, ka thënë një puntorë teknik.
Por jo vetëm në Fushë Kosovë, të njëjtin problem e kanë edhe punëtorët mbështetës të Komisionit Qendror të Zgjedhjeve, edhe në Viti.
Nënkryetari i kësaj komune, Hasan Aliu thotë se e gjithë kjo po ndodhë për shkak se nuk parashihen në buxhet pagesa e këtyre punëtorëve.
“Zgjidhja më e mirë është që në momentin kur janë shpallë zgjedhjet me datën 7 qershor, sikurse janë paraparë mjetet për materialet, për zgjedhjet, është dashtë me parapa edhe çështjen e punëtorëve teknikë, ndërsa Komunës i mbesin problemet tjera, si sigurimi i objekteve apo qendrave të votimit, sigurimi i rrymës”, ka thënë Aliu.
E për këtë kanë reaguar edhe nga Asociacioni i Komunave të Kosovës, të cilët thonë se kanë kërkuar nga KQZ që kjo pagesë të mos i lihet komunave.
“Ne ja kemi dërguar një kërkesë ku kemi kërkuar që kjo barrë financiare të mos ia bartim komunave, mirëpo ende nuk kemi një përgjigje. Po shpresojmë që do të hasim në mirëkuptim sepse sinqerisht barra financiare për komunat po rëndohet dita e ditës”, u shpreh Ibrahimi.
Tëvë1 ka dërguar pyetje edhe në Komisionin Qendror të Zgjedhjeve rreth pagesës së punëtorëve mbështetës, por gjatë ditës nuk ka marrë përgjigje.
