Të paktën 95 palestinezë janë vrarë dhe 440 të tjerë janë plagosur në sulmet izraelite në të gjithë Gazën në 24 orët e fundit, sipas Ministrisë së Shëndetësisë së enklavës.
Sipas agjencisë Anadolu, katër persona, përfshirë një fëmijë, u vranë në bombardimet izraelite në Jabalia dhe Khan Younis në veri dhe jug të Gazës.
Agjencia zyrtare palestineze Ëafa raportoi se një sulm në një tendë ku strehoheshin të zhvendosur brenda një shkolle në Khan Younis vrau 18 persona dhe plagosi disa të tjerë. Viktimat përfshinin edhe fëmijë.
Trupat e 14 prej tyre u dërguan në Kompleksin Mjekësor Nasser, ndërsa 12 persona u plagosën.
Shtatë civilë të tjerë humbën jetën në bombardimet në Gazën veriore, ndërsa një palestinez u vra dhe 10 të tjerë, kryesisht gra, u plagosën në kampin e refugjatëve Nuseirat në Gazën qendrore.
Dëshmitarët thanë se katër persona të tjerë u vranë nga sulmet ndaj dy shtëpive në qytetin e Gazës dhe Khan Younis. Po ashtu, u raportuan bombardime në zonat Qizan al-Najjar dhe verilindje të qytetit të Gazës, megjithëse pa të dhëna të menjëhershme për viktima.
Ndërkohë, teksa palestinezët po përballen me uri ekstreme, ushtria izraelite i ka paralajmëruar palestinezët e uritur në Gaza të mos i afrohen rrugëve që të çojnë në vendet e shpërndarjes së ndihmave të mbështetura nga SHBA-të, të drejtuara nga Fondacioni Humanitar i Gazës (GHF), i cili do të mbyllet për një ditë të tërë për “punë rinovimi, riorganizimi dhe përmirësimi të efikasitetit”.
Ofensiva izraelite në Gaza, e nisur në tetor 2023, ka shkaktuar mbi 54,600 viktima palestineze, shumica gra dhe fëmijë, pavarësisht thirrjeve ndërkombëtare për armëpushim.
Në nëntor 2024, Gjykata Ndërkombëtare Penale lëshoi urdhër-arresti për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, për krime lufte dhe krime kundër njerëzimit.
Ndërkohë, Izraeli përballet me një padi për gjenocid në Gjykatën Ndërkombëtare të Drejtësisë.
