Suedia dhe Holanda i bënë thirrje të enjten Bashkimit Evropian që të pezullojë tregtinë me Izraelin për shkak të situatës humanitare “jashtëzakonisht shqetësuese dhe të patolerueshme” në Gaza dhe planeve të Izraelit për një vendbanim të ri në Bregun Perëndimor.
Në një letër të përbashkët drejtuar shefes së politikës së jashtme të BE-së, Kaja Kallas, të parë nga transmetuesi irlandez RTE News, të dy vendet akuzuan gjithashtu Izraelin për dështimin në zbatimin e një marrëveshjeje të korrikut me BE-në për rritjen e ndihmës humanitare për Gazën.
Marrëveshja e korrikut, e arritur midis Kallas dhe Ministrit të Jashtëm të Izraelit, Gideon Sa’ar, kishte parandaluar më parë një sërë sanksionesh të mundshme kundër Tel Avivit, përfshirë pezullimin e elementit tregtar të Marrëveshjes së Asociimit BE-Izrael.
Në letrën e tyre, ministrat e jashtëm holandezë dhe suedezë thanë se tani “mbështesin pezullimin e kapitullit tregtar të marrëveshjes së Asociimit BE-Izrael dhe i bëjnë thirrje Komisionit (Evropian) të paraqesë një propozim për këtë qëllim”.
Ministrat gjithashtu bënë thirrje për sanksione të synuara kundër “ministrave ekstremistë izraelitë që promovojnë aktivitete të paligjshme të vendbanimeve dhe punojnë në mënyrë aktive kundër një zgjidhjeje të negociuar me dy shtete”.
Ata i kërkuan më tej Kallasit të ofrojë një analizë me shkrim të pajtueshmërisë së BE-së me mendimin këshillimor të vitit 2024 të Gjykatës Ndërkombëtare të Drejtësisë mbi pushtimin e territoreve palestineze nga Izraeli, citon Anadolu.
Letra theksoi gjithashtu rolin e Hamasit, duke thënë se grupi “mban një përgjegjësi të madhe për situatën katastrofike” në Gaza dhe duke i bërë thirrje atij të heqë dorë nga pushteti, të çarmatoset dhe të lirojë pengjet e mbetura izraelite.
Të dy ministrat e përshkruan miratimin e Planit të Ndërtimit E1 nga Këshilli i Lartë i Planifikimit Izraelit – i cili do të zgjeronte një vendbanim hebre në Bregun Perëndimor dhe do të prishte rëndë vazhdimësinë e çdo shteti të ardhshëm palestinez – si “të papranueshëm dhe një shkelje të qartë të së drejtës ndërkombëtare”.
Izraeli ka vrarë gati 63,000 palestinezë në Gaza që nga tetori i vitit 2023. Fushata ushtarake ka shkatërruar enklavën, e cila po përballet me urinë.
