Organizata Albanians for America (AFA) ka vlerësuar vizitën e kongresistëve amerikanë Keith Self dhe Suhas Subramanyam në Kosovë si një sinjal të fuqishëm të mbështetjes bipartizane të Shteteve të Bashkuara për shqiptarët.
Në një postim në Facebook, AFA thekson se kjo vizitë bart peshë të veçantë politike dhe strategjike, sidomos në një kohë kur rajoni përballet me sfida të sigurisë dhe zhvillimit.
Sipas tyre, mbështetja amerikane për Kosovën mbetet konstante dhe mbi dallimet politike, duke e cilësuar raportin me SHBA-të si vendimtar për rrugën euroatlantike të vendit.
Editoriali ndalet edhe te vizita e delegacionit në Luginën e Preshevës, duke e cilësuar atë si dëshmi se çështja e shqiptarëve në atë rajon nuk është harruar. AFA thekson se shqiptarët atje përballen me “diskriminim institucional dhe margjinalizim”, ndërsa vizita e kongresistëve shihet si mesazh i qartë i vëmendjes amerikane.
Organizata rikujton edhe vizitat historike të delegacioneve amerikane në Kosovë gjatë viteve ’90, duke theksuar se edhe sot, si atëherë, roli i SHBA-ve mbetet kyç për të ardhmen e Kosovës.
AFA vlerëson veçanërisht angazhimin e kongresistit Keith Self, i cili ka mbështetur publikisht Kosovën dhe ka kërkuar avancimin e pozitës së saj në arenën ndërkombëtare, përfshirë edhe anëtarësimin në NATO.
Në përfundim, theksohet se lidhja Kosovë–SHBA mbetet aleancë strategjike dhe historike, ndërsa vizita e fundit konsiderohet vazhdim i kësaj partneriteti në mbrojtje të interesave të shqiptarëve në rajon.
