Ka filluar administrimi i provave në gjykimin ndaj Jelena Gjukanoviq, e akuzuar për spiunazh në favor të Shërbimit Sekret të Serbisë, gjatë kohës kur punonte si zyrtare e OSBE-së në Kosovë.
Prokurori Bekim Kodraliu po prezanton provat e aktakuzës përmes një prezantimi PowerPoint.
E akuzuara Gjukanoviq është deklaruar sërish e pafajshme, siç kishte bërë edhe më 16 shtator 2025.
Gjykata e Apelit të Kosovës, me vendimin e 20 janarit 2026, aprovoi ankesën e Prokurorisë Speciale, duke ndryshuar vendimin e Themelores dhe duke llogaritur si prova të pranueshme gjetjet në telefonin e të akuzuarës.
Sipas aktakuzës së ngritur më 2 shtator 2025 nga Prokuroria Speciale e Kosovës, Gjukanoviq akuzohet se nga data e pacaktuar deri më 28 shkurt 2025, ka kryer veprime të përsëritura për t’i ofruar informacione të ndjeshme Shërbimit Sekret të Serbisë (BIA), përmes komunikimeve me agjentin rezident Aleksandër Vllajiq.
Veprimet e saj dyshohet se përbëjnë ndihmë aktive ndaj veprimtarisë informative të Serbisë.
