Rindërtimi i fushës së stadiumit “Fadil Vokrri” në Prishtinë po shkon sipas planifikimit dhe po kryhet në kohë rekorde.
Kështu, ka bërë të ditur kreu i FFK-së, Agim Ademi të mërkurën me anë të një postimi në rrjetet sociale. Ai ka zbuluar se gjatë javës së ardhshme do të bëhet edhe vendosja e barit hybrid, teksa ka publikuar fotografitë e fundit nga fusha e këtij stadiumi.
Në fotografi shihet se është bërë vendosja e dheut në pjesën më të madhe të fushës pasi është kryer procesi i drenazhimit dhe instalimit të sistemit të ujitjes dhe ngrohjes.
“Punimet në fushën e stadiumit ‘Fadil Vokrri’ po kryhen në kohë rekorde. Javën tjetër bëhet vendosja e barit hibrdit”, ka shkruar Ademi në postimin e tij.
Bazuar në parashikimet e punëmarrësit, fusha e stadiumit do të jetë gati për ndeshje më 6 korrik por duke pasur parasysh ritmin e punëve, atëherë gjasat janë të mëdha që të jetë e gatshme edhe më herët.
Stadiumi “Fadil Vokrri” ishte mbyllur në fund të muajit nëntor të vitit të shkuar për shkak të gjendjes së keqe të fushës. Fusha ishte dëmtuar për shkak të ngarkesës së madhe dhe mirëmbajtjes jo të duhur.
