Zëdhënësi i Partisë Demokratike të Kosovës, Faton Abdullahu u shpreh i shqetësuar me siç tha ai arsyetimin e zëvendëskryeministrit, Besnik Bislimi për mosdëgjueshmërinë e Qeverisë Kurti ndaj kërkesave amerikane e evropiane për shtensionim të situatës në komunat veriore.
“Këto ditë më ra ta dëgjoj zëvendëskryeministrin Bislimi në një arsyetim, do të thosha, që e bëri nëse nuk gaboj edhe me shkrim. Ndoshta nuk mund ta citoj fjalë për fjalë, por në thelb ishte ky që bota perëndimore, amerikanët konkretisht duan që ne si Kosovë të heqim dorë në pjesë të madhe nga sovraniteti ynë në veri, në mënyrë që ta tundojmë Serbinë që ajo t’i afrohet botës perëndimore. Thelbi është ky. Nëse e analizojmë si duhet kjo është mendësi politike dje opozitare, sot qeverisëse, e cila e ka fillin tek opozitarizmi apo tek ato fjalë që janë thënë “thikat mbi harta, shtëpia e verdhe, e bardhë, e kuqe e të tjera” si i ka kualifikuar”, u shpreh Abdullahu në emisionin “Këndi i Debatit” në Tëvë1.
Me tej, ai tha se të konstatohet se amerikanët po duan ta dëmtojnë Kosovën për ta joshur Serbinë për t’u shkëputur nga ndikimi i Rusisë është teori konspirative dhe antiamerikane.
“Të konstatosh kështu që amerikanët duan të bëjnë diçka në dëm të Kosovës për ta tunduar Serbinë në mënyrë që ajo të shkëputet nga kthetrat ruse është as më pak e as më shumë se qasje, teori edhe konspirative edhe antiamerikane”, shtoi Abdullahu.
