Kryetari i Lidhjes Demokratike të Kosovës (LDK), Lumir Abdixhiku, ka ofruar dorëheqjen nga posti i kryetarit të partisë gjatë mbledhjes së Kuvendit të LDK-së. Ai theksoi se ky akt vjen si një obligim moral pas rezultateve të dobëta zgjedhore dhe si një mënyrë për të ballafaquar me pritjet dhe zhgënjimin e ndjerë nga anëtarësia.
“Të dashur delegatë, me përgjegjësi të plotë ia ofroj për shqyrtim Kuvendit të LDK-së dorëheqjen time nga detyra e kryetarit, për ta vendosur përballë këtij Kuvendi çështjen e votëbesimit,” ka deklaruar Abdixhiku para delegatëve, duke e bërë të qartë se dorëheqja është një akt i vendosur në kuadër të transparencës dhe përgjegjësisë ndaj anëtarësisë.
Në fjalimin e tij të gjatë, Abdixhiku ka theksuar se “ambicia personale nuk duhet të mbizotërojë mbi frymën kolektive dhe demokracinë e brendshme të LDK-së.” Ai ka shtuar se shumë sy kanë qenë të drejtuar kah karrigia e kryetarit, por “forca e vërtetë e Lidhjes Demokratike të Kosovës nuk qëndron në një karrige të vetme.”
Abdixhiku ka shpjeguar se fuqia e LDK-së është në unitetin e anëtarësisë dhe në vullnetin kolektiv të saj: “Ajo qëndron këtu përballë meje. Në këtë sallë. Në vullnetin tuaj. Këtu përcaktohet fati i secilit prej nesh dhe këtu matet fuqia jonë e vërtetë.”
Në vijim të fjalës, ai njoftoi se nga ky moment, drejtimin e punimeve të Kuvendit do t’ia kalojë Kryesisë së Punës, duke theksuar se procesi duhet të jetë i pavarur nga ndikimet individuale.
“Prandaj, nga ky moment, i kaloj punimet tek Kryesia e Punës e këtij Kuvendi. Këto punime duhet të jenë të pavarura nga çfarëdo ndikimi individual,” tha Abdixhiku, duke shtuar se do të ulet si njëri nga 355 delegatët e partisë dhe se vendimmarrës tani janë delegatët, jo ai personalisht.
Ai përmbylli fjalimin e tij me një urim për LDK-në dhe për popullin e Kosovës: “Nga ky moment, vendimmarrës jeni ju! Zoti e bekoftë Lidhjen Demokratike të Kosovës. Zoti e bekoftë popullin e Kosovës. Zoti e bekoftë Republikën tonë! Ju faleminderit,” përfundoi Abdixhiku.
