Kryetari i Lidhjes Demokratike të Kosovës, Lumir Abdixhiku, ka thënë se në takimin e përbashkët me partitë politike të ftuar nga presidentja Osmani do ta paraqes propozimin e kësaj partie për një Qeveri nacionale të tranzicionit, duke e vlerësuar si rrugë zgjidhje me shumë përfitime për vendin.
Ai ka thënë se mirëpret ftesën e Osmanit, por ka shtuar se për të gjetur zgjidhje duhen propozime e ide të reja
“LDK-ja mirëpret secilën mundësi në funksion të daljes nga kjo gjendje, përfshirë takimin e përbashkët të ftuar nga Presidentja. Por që një nismë të ketë sukses, duhet të paraprihet me ide të reja. Insistimi në të vjetrat, edhe në takim, nënkupton komfort dhe bllokim të mëtejmë. Zgjidhja e mundshme e propozuar nga ne mbetet si rrugëzgjidhje me shumë përfitime për vendin, sepse, më shumë se dëshirat partiake, Kosova ka nevojë për institucione funksionale. Këtë propozim do ta paraqesim dhe në takimin në fjalë”, ka shkruar ndër të tjera Abdixhiku.
Osmani ka ftuar partitë në një takim më 15 maj, PDK, LDK e AAK kanë konfirmuar pjesëmarrjen.
Deri tash nga Vetëvendosje nuk janë deklaruar për këtë takim.
