Lidhja Demokratike e Kosovës ka shënuar 36-vjetorin e themelimit. Kreu i kësaj partie, Lumir Abdixhiku, tha se themelimi i LDK-së ishte lindje e aspiratave politike për liri, pavarësi dhe demokraci.
Në ceremoninë e këtij përvjetori, Abdixhiku tha se nderojnë trashëgiminë e atyre që hodhën themelet e LDK-së, në krye me presidentin historik, Ibrahim Rugova.
“Janë 36 vite guxim, qëndrueshmëri dhe përkushtim i palëkundur ndaj idealeve të lirisë, demokracisë dhe vetështetësisë, në një rrugëtim historik që ka përcaktuar jo vetëm fatin e shtëpisë sonë të demokracisë, por fatin e vendit dhe gjithë kombit tonë. Ne nderojmë trashëgiminë e atyre që hodhën themelet e kësaj lëvizjeje të madhe, siç edhe reflektojmë për rrugën e gjatë dhe të lodhshme, gjithsesi të papërsëritshme, që kemi përshkruar për 36 vite rresht. Lindja e LDK-së ishte lindje e aspiratave të artikuluara politike për liri, pavarësi dhe demokraci; ishte lindje e përpjekjes sonë për jetë të lirë, të dinjitetshme, të pavarur në shtetin e Kosovës”, tha ai.
Abdixhiku shtoi se kauzat e LDK-së ishin gjithmonë për një shtet të lirë, të pavarur, sovran dhe të integruar në Bashkimin Evropian dhe në NATO, si dhe në miqësi të përhershme me Shtetet e Bashkuara të Amerikës.
Sipas tij, në shërbim të këtyre kauzave, LDK u vendos përballë frymave populiste dhe keqpërdoruese për Kosovën.
“Kauzat tona ishin të një shteti të lirë, të pavarur dhe sovran, të integruar në Bashkimin Evropian, në NATO dhe në miqësi të përhershme me Shtetet e Bashkuara të Amerikës. Në shërbim të kësaj kauze, LDK u vendos përballë frymave populiste, përdoruese dhe keqpërdoruese, që Kosovën e shndërruan jo rrallë herë në fushëbetejë të papërgjegjshmërisë politike, ku çmimet e së cilës i paguajnë në veçanti qytetarët sot”, theksoi Abdixhiku.
Abdixhiku, së bashku me zyrtarë të lartë të LDK-së, gjatë ditës bënë edhe homazhe te varri i presidentit historik dhe ish-kryetarit të LDK-së, Ibrahim Rugova.
Lidhja Demokratike e Kosovës është themeluar në vitin 1989, ku iniciuesit kryesorë ishin një grup intelektualësh dhe veprimtarësh shqiptarë të Kosovës, në krye me Rugovën.
