Kryetari i Lidhjes Demokratike të Kosovës, Lumir Abdixhiku, ka bërë të ditur se të premten dhe gjatë kësaj jave ka pritur në takime në Selinë Qendrore të LDK-së Anu Prattipati, të Ngarkuarën me Punë në Ambasadën e SHBA-ve në Kosovë, Olivier Guérot, ambasadorin e Francës, Jonathan Hargreaves, ambasadorin e Mbretërisë së Bashkuar, si dhe Maurizio Antonini, ambasadorin e Italisë.
Sipas Abdixhikut, në këto takime është diskutuar për zhvillimet politike në vend, rrugëtimin euro-atlantik të Kosovës, forcimin e partneriteteve strategjike dhe rëndësinë e stabilitetit institucional për të ardhmen e Republikës.
“Për Lidhjen Demokratike të Kosovës, bashkëpunimi i ngushtë me aleatët tanë mbetet orientim i palëkundur politik e shtetëror”, ka shkruar ai në Facebook.
Në fund, ai ka theksuar se Kosova ka nevojë për miqësi të forta, partneritet të qëndrueshëm dhe një zë serioz e të besueshëm në raport me botën./teve1.info/
