Në tubimin përmbyllës të fushatës në kryeqytet, kryetari i Lidhjes Demokratike të Kosovës (LDK), Lumir Abdixhiku, ka bërë thirrje për mbështetje të kandidatëve të partisë, duke theksuar se Prishtina duhet të vazhdojë rrugën e zhvillimit me LDK-në dhe me kryetarin aktual, Përparim Ramën.
Në fjalimin e tij para simpatizantëve, Abdixhiku u shpreh se LDK-ja ka dëshmuar se kur është në qeverisje, “qyteti ecën përpara, modernizohet dhe zhvillohet në çdo drejtim”.
“Të dielën, më 9 nëntor, Prishtina flet sërish. Këtë herë me vendosmëri dhe krenari – për të vazhduar me LDK-në, për të vazhduar me Përparim Ramën, dhe për të vazhduar rrugën e punës, të dinjitetit dhe të qytetarisë”, tha Abdixhiku.
Ai shtoi se për katër vjet qeverisje, LDK-ja ka dëshmuar përkushtim ndaj zhvillimit urban, shërbimeve publike dhe mirëqenies së qytetarëve të Prishtinës, ndërsa apeloi që të dielën qytetarët të dalin masivisht në votime. /teve1.info/
