Kryetari i Lidhjes Demokratike të Kosovës, Lumir Abdixhiku, në një konferencë për media ka deklaruar se Lëvizja Vetëvendosje nuk e ka mbështetur rikandidimin e Vjosa Osmanit për presidente.
Ai tha se LDK-ja ka vepruar me përgjegjësi institucionale dhe ka tentuar të kontribuojë në stabilitetin e vendit, përmes pjesëmarrjes në takime dhe ofrimit të zgjidhjeve kompromisi.
“Sepse, në fakt, kishim një parti politike dhe një eksponent të saj, i cili, në njërën anë, është i pangopur për pushtet, i do të gjitha, e në anën tjetër është i paaftë të arrijë kompromis,” ka thënë Abdixhiku.
Ai shtoi se deputetët e LDK-së kanë qenë të gatshëm të kontribuojnë në zgjidhjen e krizës institucionale.
“Deputetët e Lidhjes Demokratike të Kosovës, 15 sosh, kanë qëndruar me plot përgjegjshmëri dhe bindje për t’i dhënë zgjidhje stabilitetit institucional të vendit. Është kërkuar konsensus, kemi marrë pjesë në takime. Është kërkuar emër, kemi dhënë edhe mundësinë për emrin për president. Na janë kërkuar nënshkrimet, janë ofruar ato nënshkrime,” u shpreh ai.
Sipas Abdixhikut, problemi ka qenë mungesa e votave nga Lëvizja Vetëvendosje për Vjosa Osmanin.
“Por, në fund, në fakt, problemi është parë që ky emër, i Vjosa Osmanit, është synuar më tepër si kuorum për një presion që ata e quajnë shantazh. Ne, Vjosa Osmanin, nuk e shohim si kuorum për presidenten e tyre… e shohim më shumë se kaq, si presidente të denjë të Republikës së Kosovës. Por kjo votë nuk u dha nga Lëvizja Vetëvendosje,” tha ai.
Abdixhiku kritikoi edhe mënyrën e zhvillimit të seancës, duke e quajtur procesin të njëanshëm dhe të dëmshëm për institucionet.
“Sonte u pa edhe një keqpërdorim i institucionit më të lartë të vendit, Kuvendit. Mënyra se si u udhëhoq ky proces, me një monolog të një partie autoritare… me gjuhë që më së paku ishin shantazh,” deklaroi kreu i LDK-së.
