Kryetari i LDK-së dhe kandidati për kryeministër nga kjo parti, Lumir Abdixhiku i ka shkruar letër Presidentes së Komisionit Evropian Ursula von der Leyen, të cilës i ka kërkuar heqjen e menjëhershme të masave ndaj Kosovës.
Në letrën e Abdixhikut thuhet se është plotësuar kriteri kryesor për heqjen e masave pas transformimit të pushtetit lokal në katër komunave veriore të banuara me shumicë serbe.
“Lidhja Demokratike e Kosovës (LDK) kërkon heqjen e menjëhershme të masave ndëshkuese të Bashkimit Evropian ndaj Republikës së Kosovës. LDK vlerëson se vazhdimi i këtyre masave është i pajustifikuar dhe nuk pasqyron zhvillimet aktuale politike dhe institucionale në vend. Masat e Bashkimit Evropian po prodhojnë pasoja të drejtpërdrejta për qytetarët e Kosovës dhe po dëmtojnë institucionet e shtetit. Pushteti lokal në Republikën e Kosovës në komunat veriore tashmë është transferuar dhe është plotësuar kriteri i vendosur nga BE-ja”, thuhet në letër.
Sipas LDK-së këto masa kanë dëmtuar drejtpërdrejt Kosovën dhe qytetarët e saj, e jo politikanët. Si pasojë, një numër i konsiderueshëm projektesh zhvillimore dhe investimesh të rëndësishme kanë mbetur të bllokuara dhe të parealizuara, duke penguar zhvillimin ekonomik dhe përmirësimin e shërbimeve publike.
“Lidhja Demokratike e Kosovës i bën thirrje Bashkimit Evropian që të marrë vendim për heqjen e plotë të masave ndëshkuese ndaj Republikës së Kosovës, në përputhje me parimet e drejtësisë, proporcionalitetit dhe partneritetit. Republika e Kosovës meriton trajtim të drejtë dhe mbështetje konkrete në rrugëtimin e saj evropian”, thuhet në letër.
Bashkimi Evropian kishte vendosur masa ndaj Kosovës në maj të vitit 2023 për shkak të trazirave në veri, ku Qeveria e Kosovës ishte bërë përgjegjëse për situatën.
Kosova, kishte kundërshtuar këto masa duke i quajtur të pa drejta.
Ndërsa, Bashkimi Evropian ka njoftuar se ka filluar heqja graduale e masave ndaj Kosovës.
