Kryetari i Lidhjes Demokratike të Kosovës (LDK), Lumir Abdixhiku, ka bërë të ditur se partia e tij nuk ka interes për pozitën e kryetarit të Kuvendit, duke vlerësuar se ky funksion i takon subjektit politik fitues, në përputhje me përcaktimet kushtetuese.
Pas takimit me kryeministrin në detyrë, Albin Kurti, Abdixhiku ka thënë se për çështjet e tjera politike ka hapësirë kohore për të vazhduar diskutimet dhe për të arritur një marrëveshje.
Sipas tij, nëse deri më 6 gusht nuk arrihet një dakordim, procesi i konstituimit të institucioneve duhet të vazhdojë.
“Nese deri më 6 gusht nuk ndodh asgjë kemi kërkuar që të vazhdohet të procesohet tutje me konstituimin e kuvendit sepse nuk ka nevojë që të pritet. LDK-ja nuk ka asnjë apetit për kryetarin e Kuvendit, sepse është figurë ceremoniale e cila duhet të përfaqësojë propozimin e partisë së parë siç e thotë edhe Kushtetuta.Për çështje të tjera kemi afat kohor shtesë. Sa më herët të bëjmë zgjidhje, aq më mirë”, ka deklaruar Abdixhiku./teve1.info/
