Kreu i Lidhjes Demokratike të Kosovës, Lumir Abdixhiku, i është kundërpërgjigjur kryeministrit në detyrë, Albin Kurti, i cili kishte thënë se nuk po e kupton LDK-në se pse nuk pranon të bashkëpunojë me Vetëvendosjen në asnjë nivel.
Abdixhiku ka theksuar se nuk çuditet pse Kurti nuk e kupton këtë, duke shtuar se “fjala e dhënë ka peshë dhe s’ka pozitë, pushtet apo ofertë që mund të shkelë mbi këtë vlerë”.
“LDK-në mund ta sulmoni. Mund dhe ta ofendoni – por vetëm kaq keni mundësi. Nuk ju vie rendi për më shumë. LDK po ecën drejtë. Në rrugën e vet. Për vete dhe për Republikën që e krijoj vet.
Zot politik, kjo LDK, ka vetëm elektoratin e vet dhe koha e LDK-së nuk ndërtohet në prehërin e askujt. LDK ka shtratin e vet; lumi i saj rrjedhë fort gjithëherë. Sepse ishim, jemi dhe do të mbesim të vërtetë. Krenar e faqebardhë dhe me besim të fortë në të ardhmen e popullit tonë.”
Në një reagim të ashpër ndaj Kurtit, Abdixhiku e akuzon atë për bllokim të institucioneve dhe shkelje të Kushtetutës:
“…një njeri që për 48 herë e shkelë Kushtetutën dhe mburret se çfarë po bën; një njeri që uzurpon institucionet duke qenë herë kryeministër e herë deputet; një njeri që s’respekton Gjykatat e Republikës siç respektohen ato në shtetin ku ai rritë familjen e vet; një njeri që vendoset mbi prokurorinë e mbron të korruptuarit partiak vetëm se janë të tij; një njeri që vetëm ofendon e vetëm përçanë kudo që prekë; një njeri që akuzon kundërshtarët politik, shtëpinë e madhe të demokracisë, me tradhëtarë të Serbisë vetëm pse mendojnë ndryshe nga ai; një njeri që na ofendon elektoratin me ‘hajvanat’ dhe pret shtrirje qafe më pas; një njeri që na izolon Republikën e vet, e na e humbet të ardhmen e fëmijëve në këtë shtet; një njeri që nuk e kupton bashkëpunimin, unitetin, e afrimin si akt patriotik sot; një njeri që ndryshon pa merzi secilin premtim publik; – një njeri i tillë, natyrisht se nuk e kupton se çka do të thotë parimi i drejtë në jetë.”
